Barang

(Ni Mylene Jesusa)

Morag wa lang sa akong kaugalingon ang paghilak ni Nestor. Wa gyud tingali siya magtuo nga sulod sa duha ka tuig namong panaghigugmaay, makigbuwag ako niya.
"Wa man koy sala nimo, Arlene. Nganong gipasakitan mo man ako?"
Simple lang ang hinungdan, Nestor. Wa na ko love nimo."
Huyho ang mga abaga ni Nestor nga mikanaog sa among balay sa Gorordo Avenue. Nangyamiid ako sa iang paghilak. Morag di lalaki, bagutbot ko sa hilom.
"Unsa? Imong gibuwagan si Nestor tungod ni Rodel?"
Nasiga ang mga mata sa akong kauban sa trabaho sa pabrika sa sinilas sa siyudad. Nahikatawa ko sa iyang reaksiyon.
"Yes, Carla." Morag mapagarbuhon ko sa akong tubag.
"Por dios por santo, Arlene. Dakong minyo si Rodel. Di ba nagkarelasyon na mo kaniadto? Ug karon mibalik na sab ka niya?"
"So what kun minyo, Carla? So what kung kabit lang ko niya? Ang importante mao ang kwarta. Dato siya ug ang iyang asawa tua manarbaho sa gawas sa nasud. Libre kami sa tanang panahon."
"Kaingnon ko'g nakat-on na ka dihang naglikay ka na niya kaniadto, Arlene. Apan nawong gyud diay ka'g kuwarta."
Inay maglagot ko sa gisulti ni Carla, gikataw-an ko lang siya.
"Naglikay ko niya kaniadto kay mipauli man ang iyang asawa dinhi. Ug karon nga mibalik na sab siya sa abroad, nag-uli na sab kami ni Rodel. Si Rodel ang makahatag nako og daghang kuwarta. Di sama kang Nestor nga gamay ra ang suweldo sa iyang gitrabahoan.
"Apan wa ka ba mahadlok, Arlene, nga kaliwat ra ba'g magbabarang si Nestor?"
"Tuo ka man anang barang, Carla. Di na tinuod,uy!"
Sa pagpanglabay sa mga adlaw, malipayon ako uban kang Rodel. Kanunay namong gitagbaw ang among kaugalingon sa kalipay sulod sa bugnaw'ng lawak sa motel.
Usa ka adlaw niana, mikalit lang pagsakit ang duha nako ka suso. Gisultihan ko si Rodel bahin niini.
"Ayaw kabalaka, Arlene. MAngadto kita sa doktor. Ipatsek-ap nato kana."
Apan sa kadaghan sa tambal nga akong natumar, wa gyud molurang ang kasakit sa akong duha ka suso. Gipa-ultrasound ko ni Rodel. Way nakitang depekto ang mga doktor sa akong dughan. Hangtod nga nagkaluya ko. Midaot ko pag-ayo. Gitalikdan na sab ko ni Rodel. Nakahilak ko dihang iyang gisulti nako nga wa na ko'y silbi. Nahanaw na kuno ang akong katahum.
Hangtod nga naglubog na lang ko sa banig. Nawad-an na ko'g kusog.Wa na sab ko tagda sa akong mga ginikanan ug mga igsoon. Gikayugtan nila ako tungod sa pagpakigrelasyon ko kang Rodel nga dakong minyo.
"Gaba na kana nimo, Arlene."
Igo na lang ako sa pagpatulo sa akong mga luha sa pagsudya ni Carla nako dihang iya akong giduaw. Ug nianang pagka gabii, labihan nakong lisanga kay adunay mga gagmay'ng hulmigas nga nanggawas sa duha nako ka suso. Gusto kong mosinggit ug mangayog pakitabang sa akong mga ginikanan. Apan di na mabuka ang akong mga baba.
Unya nahinumdom ako kang Nestor nga akong gipasakitan bisan walay sala nga nabuhat kanako.