Ang Gugma

(Ni Joel M. Solon)

Si Raul ug Liliosa dili dato. Apan dili usab sila matawag nga pobre. Kay aduna man sila'y maanindot nga balay, tulo ka ektaryang yuta sa Bonbon, Aloguinsan ug usa ka sakyanan.
Si Liliosa registrar sa usa ka inilang kolehiyo sa dakbayan sa Sugbo. Samtang si Raul usa ka realtor. Sa sinugdanan si Liliosa dako gyud nga supak sa pangutang ilabi na sa mga "credit cards" kay mao kini hinungdan sa kalisod sa pagpuyo sa daghang mga pamilya sa tibuok kalibutan.
Apan gumikan sa pagsige og tintal sa iang amiga nga si Dorothy nga usa ka depatment head sa tunghaan nga iyang gialagaran natintal gayod siya. Diyutay lang ang iyang giutang sa unang tuig sa iyang paggamit ug credit cards. Kay maao man ang dagan sa pagpamaligya og yuta ni Raul.
Gisayonan si Liliosa sa pagbayad sa iyang binulan nga kaakoan kay maayo pa man ang dagan sa trabaho ni Raul. Naengganyo siya sa pagpangutang og dako ilabi na sa dihang nakakomisyon si Raul og dako.
Apan samtang nagkadako ang ilang utang sa credit card kalit lang nga nausab ang dagan sa ilang panginabuhi. Si Raul nga maoy gisaligan ni Liliosa nga maoy mobayad sa ilang nagkadako nga utang kalit man lang namatay gumikan sa atake sa kasingkasing.
Gumikan sa wa damhang panghitabo ania karon si Liliosa hapit na mabuktot sa pagtrabaho aron lang makabayad sa iyang utang sa credit card. Nahunahuna karon ni Liliosa nga kun aduna pa lang unta siya'y panglantaw nga di niya maseguro ang ugma kay di siya ang tag-iya niini tingali di niya matagamtam ang makusog nga bagyo sa iyang kinabuhi. Iya na karong nahunahuna nga ang Diyos kinahanglan gayod nga maoy mag-una sa matag lakang nga atong himuon.