Mga Pinalihog ni Kapitan Josh

Lyra Luz Hayag Nuñeza
c/o University of Cebu, Cebu City

NAGHINUKTOK pag-ayo si Kapitan Josh human siya sultihi ni Mayor Azenun nga adto sa ilang balay maniudto ang tanang mga barangay kapitan inigka Lunes human sa pagahimuong tigom. Dili ang pagpakaon sa mga barangay kapitan ug ingon man sa grupo sa mayor maoy naproblemahan ni Kapitan Josh, kay daghan man siyag binuhing hayupan nga iyang maihaw dayon, sama sa baboy, kanding ug manok.

Ang nakahatag kaniyag problema mao ang gipahimangno kaniya sa ilang mayor.

“Magpasidaan lang ko nimo, Kap, nga matngunan lang gyud ninyo nga walay mahitabong dautan sa atong mga bisita unya. Daghan ra bag hiloan dinhi sa inyong dapit,” matod ni Mayor Azenun. “Timan-i lang nga kon duna gani mahiloan sa atong kaubanan, ikaw gayud ang manubag!”

Dili sab hinuon mabasol ni Kapitan Josh ang mayor nga nakasulti sa ingon. Tinuod man nga daghan kaayong mga hiloan sa ilang dapit.

Gani ang taga laing lugar magpanagana sa pagpamista sa ilang barangay. Ubay-ubay na man god ang nahiloan atol sa pista.

Ang lagmit mamista kadto ra nga mga suod kaayo o kadugo gayud sa tagbalay. Bisan gani ang manindahay og mga pagkaon ug ilimnon maglisod pa nga mahalinan, kay ang mamalit kanila kadto ra mang ilang mga kaila. Dili gani nila kaila ang maninda, dili usab mamalit ang mga tawo.

Dugay kaayo nga gitun-an ni Kapitan Josh ang angay niyang buhaton. Sa tanto niyang paghunahuna nakakaplag ra siyag usa ka maayong paagi.

Gipatawag niya ang tanang mga gidungog nga hiloan sa ilang dapit. Iya silang giingnan nga siya (si Kapitan Josh) mamalihog kanila aron sila maoy mohikay sa mga pagkaon nga alang sa manambong sa tigom nga gipatawag sa mayor. Nagpasidaan sab siya nga kinahanglan nga wala gayuy mahitabo sa mga bisita inigka Lunes.

Likayan nga wala gayuy malanag o mahilo sa makakaon sa ilang hikay. Giingnan pod sila sa kapitan nga silang tanan ang manubag kon dunay mahilo bisan usa sa ilang mga bisita.

Kaadlawon pa gani nianang pagka Lunes diha na ang tanang pinalihog. Pito tanan: upat ka lalake ug tulo ka babaye.

Giihaw nila ang baboy, kanding ug mga manok.

Samtang nagkapuliki og pagpangluto ang mga pinalihog hilom siyang naniid sa matag usa kon kinsa gayud sa pito ang mangahas pagbutang og hilo sa gipangluto nilang potahe. Wala siyay nasakpan.

“Ayaw gyud mo og tinuntog butang sa inyong mga kinuptanan, ha!

Maamong gyud tang tanan pananglit dunay mahilo sa makakaon sa atong gipangluto nga mga pagkaon!” Nabatian ni Kapitan Josh ang kinatiguwangan sa mga pinalihog nga mipasidaan sa iyang mga kauban.

Nakapahiyom si Kapitan Josh. Nakasiguro na siya nga way mahilo sa ilang mga bisita atol unya sa pagpangaon sa ilang mga bisita. Wa nay angay kabalak-an si Mayor Azenun. (KATAPUSAN)