Madyong (Mahjong)

(Ni Oliver P. Flores)
Sa tanang matang sa sugal, ang madyong maoy paborito ni Rito. Dako siyag posisyon ug suweldo sa gitrabahoang kompanya sa siyudad sa Ormoc. Kon adlaw nga Sabado ug Dominggo, magyampungad siya sa madyongan ni Manuel, ilang silingan. Half-day lang ang iyang trabaho sa Sabado, ug gikan sa hapon magbinuntagay siyag duwa og madyong hangtod na sa Dominggo sa udto.
“Madyong ra man ang nasulod sa imong ulo, Rito, kon wa kay trabaho. Wa ka nay panahon sa atong bugtong anak nga babaye,” matod ni Jenny, asawa ni Rito, usa ka higayon nga mipauli si Rito gikan sa sugalan.
“Wa man sab nako siya pasagdi, Jenny. Gigastohan nako siya sa gusto niyang kurso nga kuhaon.”
“Di kana ang buot kong ipasabot. Tagdugay na mopauli ang atong anak kon Sabado sa gabii. Wa ka lang makamatikod ani kay tua ka man sa madyongan.”
“Sagdi lang kay pakigsultihan ko si Mona.”
Tuod man, gipakigsultihan ni Rito si Mona.
“Dako na man ko, Pa. nagtinarong man sab ko sa akong pag-eskwela.”
“Ang ako ba, basig matental ka sa pagbinuang. May boyfriend ka na ba? Basig nakig-date ka maong tagdugay kang mopauli kon Sabado!”
“W-wa, Pa, uy!”
Mituo si Rito sa gisulti sa anak labi na kay wa sab siya makamatikod nga may mamisita kang Mona sa ila. Busa wan a siya magtagad sa tagdugay nga pagpauli niini.
Usa ka Dominggo, nahutdan og puhunan si Rito dihang miduwa na sab siyag madyong.
Gitawag niya si Paul, ang anak ulitawo ni Manuel nga nagtungha sab sa kolehiyo.
“Adtoa si Nang Jenny nimo, Paul, pangayog kuwarta kay nahutdan ko.”
Human ikasulti ang kantidad nga gusting pangayuon ni Rito, nagdaling mibiya si Paul sa madyongan. Kon mahutdan og puhunan si Rito, si Paul gyud ang iyang suguon sa pagpangayog kuwarta kang Jenny.
Ingon niini ang dagan sa kinabuhi ni Rito. Di sab siya matawag nga naungo sa madyong kay moduwa man lang siya niini kon way trabaho. Gawas pa, usa lang kini niya ka lingaw-lingaw. Di siya moinom ug manigarilyo.
“Kaguwapo anang imong Paul, Manuel, apan way trato!”
“Wa gud tawon. May’g nagsunod-sunod si Manuel sa iyang anak!”
“Di man sab dautan kon may trato na kanang akong anak. Ulitawo na man.”
Nagpaminaw lang si Rito sa gipanagsultihan ni Manuel ug sa kauban nilang kaduwa sa madyong usa ka buntag sa Dominggo. Unya miduol si Celina, asawa ni Manuel.
“Unsa man kahay nahitabo kang Paul, Manuel? Wa man mopauli kagabii kay sa pagsusi ko sa iyang kwarto karon, wa man siya. Morag wa man matandog ang iyang unlan ug habol, timailhan nga wa siya natulog sa ato.”
“Uy, hain man kaha kadtong bataa, Celina? Wa sab ko kadiparal nga nipauli siya kagabii.”
“Unsaon nga madyong ra man ang nasulod sa imong ulo!”
Igo lang gisundan ni Rito sa pagtan-aw si Celina nga nagyawyaw nga mibiya sa madyongan. Unya nahiabot si Jenny. Naghilak kini.
“Sus, Rito, wan a mopauli sa ato si Mona! Nabasa ko ang iyang suwat nga gibilin sa iyang kuwarto. Mikuyog siya kang Paul. Nagtaban sila!” puwerteng danguyngoy ni Jenny.
Way tingog nga nagtinan-away sila si Rito ug Manuel. Kalit silang nawad-an og kadasig sa pagpadayon pagduwa og madyong.