Pagbalik Ni Fred Sa Impyerno

(NI Israel G. Ybañez)
Mayupay, Quiot, Cebu City

SA PANGANDOY nga mahidangat sa langit ang iyang kalag gibuhat ni Fred ang pagtinarong sa iyang kaugalingon. Gipaninguha niya ang pagsunod sa kinabuhi sa mga Santos. Gikalawat ni Fred ang mithi ni San Martin nga nagaingon, “Unsay kapuslanan sa tawo kon maangkon ang tanang bahandi dinhi sa kalibutan, ug unya sa kaulahian malaglag ang iyang kalag!”

Mao nga gipuy-an ni Fred ang kinabuhing Diyosnon. Ang pagsimba maoy una niyang gihimo adlaw-adlaw sa dili pa niya buhaton ang inadlaw nga tulumanon sa panimalay ug sa pagtambong sa opisina nga iyang gialagaran.

Bisan sa imbitasyon nilang Kakal, Jaime ug Berting, mga senior citizen niyang mga barkada nga hilig sa kidlap-kidlap nga imnanan, iyang balibaran kay tuyo lagi ni Fred nga maangkon ang kalipay nga walay katapusan didto sa langit.

Apan usa ka higayon sa dihang nagsakay si Fred sa taksi wa damha nadasmagan kini sa Bus nga ilang gikasugat. Way kalibutan si Fred nga gidala sa ospital.

Samtang gihimo sa doktor ang operasyon sa lawas ni Fred mibuwag ang iyang kalag sa iyang lawas ug miatubang kang San Pedro.

“Adto ka karon sa impyerno!” mando ni San Pedro.

“Nganong sa impyerno man, Senyor San Pedro, nga gihimo man nako ang tanan aron ako mahilangit?” reklamo ni Fred.

“Maoy natala diri sa akong libro…”

Way nahimo si Fred tungod kay usa siya ka tawong masinugtanon. Gituman niya ang hukom ni San Pedro ug miadto siya sa impyerno.

Sa didto na si Fred sa impyerno hilabihan niyang lipaya kay nakita niya ang nindot nga talan-awon. Adunay namaligyag masyaw sa Jai-Alai, lotto ug uban pang sugal.

Nakita niya ang Kamagayan Part 2. dinhi nakita ni Fred ang mga guwapang tsiks nga ikatandi nilang Ara Mina, Christine Reyes ug Krista Ranillo. May mga imnanan nga kidlap-kidlap nga maoy kinaham sa mga barkada niyang si Kakal, Jaime ug Berting.

Aron masiguro nga dili na siya mabalhin gibalik ni Fred si San Pedro.

“Senyor San Pedro, adto na lang gyud ko sa impyerno kay nindot man diay didto,” hangyo ni Fred.

“Fred, wala pa matapos imong kinabuhi. Balik usa ngadto sa kalibutan,” mando ni San Pedro.

NAHUMAN na ang operasyon ni Fred. Naayo siya. Apan human niadtong hitaboa nausab ang iyang kinabuhi.

Nawala ang iyang pagka Diyosnon. Gusto siyang mobalik sa impyerno kon siya mamatay. Kanunay na siya makita sa sugalan, sa kidlap-kidlap nga imnanan ug sa Kamagayan uban ang tsiks.

Hangtod nagkasakit siya.

Sa dihang nabugtoan na si Fred sa katapusan niyang ginhawa way langay nga miadto dayon ang iyang kalag kang San Pedro.

“Senyor San Pedro, adto na ko sa impyerno, ha!” madasigong pulong ni Fred.

Gitan-aw ni San Pedro ang iyang listahan. “Sa impyerno bitaw ka!” tubag ni San Pedro.

Way kabutangan ang kalipay ni Fred. Miadto siya sa impyerno.

Apan nahisagmuyo siya tungod sa hilabihang kainit sa kayo nga misugat kaniya.

“Bay, nganong hilabihan mang inita dinhi? Unya ngiob pa?” pangutana ni Fred sa kalag nga iyang nakita.

“Hibawo bitaw kang impyerno ning lugara!” tubag sa kalag.

“Sa una lagi nakong anhi hilabihan mang bugnawa… unya daghan pang kalingawan ang akong nakita!”

“Unsaon nga sa una nimong pag-anhi turista pa man ka. Unya karon permanent resident ka na man!” matod sa kalag.

Wa nay mahimo si Fred. Tungod sa tentasyon kapakyasan sa pangandoy ang iyang nahiaguman. (KATAPUSAN)