Ang Babaye Nga Miduwag Tong-its

Bernard Pañares
Labangon, Cebu City

Mibakasyon ako sa akong mga paryente didto sa usa ka lungsod sa habagatang Sugbo. Malipayon kayo silang miabi-abi nako kay karon pa ako mahibalik dinhi sukad nakatrabaho didto sa Kuwait. Si Cesar, akong ig-agaw gihatagan nako og rubber shoes kay hilig siya sa basketbol. Ang iyang mga igsuong mga dalaga malipayon kaayong midawat sa perfume ug chocolate nga akong gitunol kanila. Si Nanay Lucing, ilang inahan ug akong iyaan, akong gitunolan og kuwarta nga ang kantidad nakalipay gyud niya.
Usa ka gabii niana giagda ako ni Cesar sa pag-uban kaniya nga mobilar sa namatyan didto sa silingang barangay. Misugot ko dayon bisan wa ko kaila kon kinsa ang namatay. Ang akong tuyo nga may makaila ako didto, labi na gyud kon dalaga nga mahimo niakong panguyaban.
Paghiabot namo sa balay sa namatyan diha pa gani mi sa pultahan mao gyuy pagsugod sa pangadye. Apiki na ang agianan padulong sa haya tungod sa daghang tawo nga nanabat sa pangadye. Busa nanaog mi sa silong diin daghang tawo sab ang nagbilar ug nalingaw sa madyong, tong-itd, chess, dama, ug piyat-piyat. Duna say nanag-inom.
Si Cesar gidapit sa iyang amiga aron molingkod sa madyongan kay kuwang silag magduduwa. Ug ako gidapit usab sa grupo nga nag-tong-its kay kulang sab sila. Milingkod ko sa bakanteng lingkuranan. Sa nagsugod na kami pagduwa may nasigpatan akong babayeng maanyag nga nagbarog likod sa lamesa. Nagpahiyom siya kanako. Unya hinay nga miduol ug mitupad nako.
Nangutana siya kon taga diin ako, kinsay akong kaila dinhi sa lungsod, ug kon mayo ba akong moduwa ning sugal nga tong-its. Gitubag ko ang tanan niyang pangutana sa hagawhaw nga tinubagan. Ang akong kaduwa nahibulong nga nagtan-aw kanako daw wala makakita o makadungog sa babaye nga akong katupad.
Nagpadayon ang among duwa. Gitabangan ako sa babaye pagbahig sa akong baraha. Wala na siya motingog ug ako igo ra sab sa pagsunod sa iyang gusto nga buhaton sa akong baraha. Milabay ang duha ka oras ug midaog akog kapin sa usa ka libo ka pesos.
Taud-taod gikablit ako ni Cesar pagsaka sa balay aron pagtan-aw sa haya kay nahuman na ang pangadye. Ang babaye nga akong tupad kalit lang nahanaw. Ako unta siyang ipaila kang Cesar.
Didto sa itaas sa balay milinya kami ni Cesar sa pipila ka mga tawo nga buot motan-aw sa haya. Dihang dinha na ko magtindog duol sa lungon midungaw ko sa gihaya. Nahasiga ang akong mga mata, ka yang gihaya mao man diay kadtong babaye nga akong gikasulti kaganina ug nagtudlo kanako pagbahig sa baraha aron modaog ko sa tong-its. Nanlimbawot ang akong balhibo.
Agig pahasubo ko kaniya ang tanan kong nadaog sa tong-its gumikan sa iyang panabang gihurot ko pagsulod sa butanganan og limos ibabaw sa iyang lungon. Nag-ampo ko nga magmalinawon unta ang iyang kalag didto sa laing kalibutan.
Sa amo nang pagpamauli gisultihan ko si Cesar bahin sa babaye nga niduwag tong-its. Naglisod siya pagtuo.